Xaaji Jamaal Baynaax Qadiid 

Xaaji jamaal baynaax qadiid  Isagoo roobdoonaya Rabbina uga dacwoonaya abaar baahday oo ku habsatay degaanka Soomaaliyeed oo dhan ayuu abwaanku tiriyey gabaygan:  Wuxuu yidhi:

Guga da’aya iyo roobabkaa, galabta soo hooray

Onkod gow leh hanqadh soo gurxamay, reen gariir bixiyey

Guulaamada nasoo fuushay iyo mayayga, soo gaadhan

Saxansaxo gufaacootay iyo udug, nasoo gaadhay

Xareed galalaclayn iyo hillaac, geestaba muuqda

Waa gallad Macbuudku uu baxshiyo, guul wanaag badane

Ganka iyo jidhkaygaa farxiyo, guudka oogada e

Xamdi aan go’ayn baan nafaran, goor iyo ayaane

 

Gobolada warkii nooga yimid, ama nasoo gaadhay

Inkastooy abaaruhu gubeen, godanka ciideena

Inkastoo kullayl gaar ah iyo, gaajo lagu sheegay

Ooy giiryartii madhatay iyo, gaabanow adhigu

Geeliina halis yahay siddii, goobtan laga sheegay

Inuu gaaga hadhay caymiyaan, Guulle barinaaye

 

Gobol kasta markii laga waramay, dhibabka soo gaadhay

Dhawr usbuuc galgalad baan ahaa, diiday gama’iiye

Murugadii qalbiga iga gasheen, gobol madoobaaday

Gacmahaan sare u taagay oon, galay khalaaweyne

 

Muddo gibin ah inkastoo Rabbigay, roobkii naga gooyey

Gurmad buu haddana soo qahriyo gaalo saad bixine

Geyigaba caddaan aan aqoon, yaa Godey tagaye

Gedduu Eebahay yidhi qofkii, garan qur’aankiisa

Raxmad goor kasta ah iyo fadlibuu, nagu gargaaraaye

 

Ganaaxiyo abaaraha dhiciyo go’ayda yeedhaysa

Rabbiyoow waxaan geysanaad, naga gudaysaaye

Gardaro qoomna kuma maagtid aan, godob samaynayne

Caasiyaal gef falay baan nahoo, galay dunuub weyne

Xaqa haddaan la garab marin dhibkani, namuusan gaadheene

Dadka qaarki geerida heshiyo, xoolahaa go’aya

Waxaan galabsaneen dhaaftay baa, taa ka gudaweyne

Adduunkaba haddaadan nagu geddiyin, mahadi kuu gaare

 

Adigaa gargaar bixin karoo, aad u gacan weyne

Gu hagaaga geyigana camima, oo beero lagu goosto

Ood shacabkan gaajada ku jira, dhereg ku gaadhsiiso

Oon gadaafo iyo cudur lahayn, gebi nusqaan oo dhan

Oon gofone iyo shillin-cas iyo, wadan gammaareeyda

 Inaad barako gaariyo nimcada, ciidda noo galiso

Geyiga roob barwaaqeeya oo, gaanka wada buuxsha

Malaa’igo smada noo godla’ oo gurmada soo dir

Deetana cirkoon gaagaxayn, goorkasta ha hooro

Ummaddana garaadka u sifee, nabad ha gaadheene  

Qoraa: Zakariye abdi