Amminta :- 10.06.14

Curiso :- Xalwo Bulxan Cali

1. Indhawaydba waataan qabiray qaafadii gabaye

2. Kamana aan qisoon waayadaan saan u qoob xiraye

3. Qarqarka aan ka furo maanta waan soo qadimayaaye

4. Qodobkaan xanuunka leh hadaan qun uga faaloodo

5. Hadii aan qasaaraha uu dhalay qeexo halistiisa

6. Soomalidu miyay qaadanoo sixi qalooceeda

7. Mise yaan laquusanoo rajada yaan la qubin weeye

8. Qaabkastoy ahaataba hadaan qoonta ka abaaro

9. Dawlad iyo markaan qaran ahayn dunidu qiimayso

10. Quwad iyo waxaan xoog lahayd ciidan qalabaysan

11. Wadankii naqoomaba waxaan qiiq kakarinaynay

12. Soo qabayaalad maahayn middii nalagu qayb qaybshay?

13. Soo qabyaalad maahany wixii nala qulaansiiyay?
14. Qaaradda afrikoo idil waxay ina quwaysaaaba

15. Qowlkaan niraahnaba waxay wadar u qaataanba

16. Qaar waxaan xoraynoo jahliga uga qudbaynaaba

17. Soo qabyaalad maahayn middi qoolka noo galisay?

18. Soo qabyaalad maahayn wiixii lay qaddarin waayay?
19. Nabad lagu qaxweeyiyo anoo gole qabow jooga

20. Wabiyada qarkoodii anoo beera qodanaaya

21. Qayraadka badihiyo anoo qubada iib geeya

22. Soo qabyaalad maahayn middi gaajo ii qonoftay?

23. Soo qabyaalad maahayn middi qaxan na leefsiisay?
24. Qabiirriyo aqoon yahanadii baratay qaynuunka

25. Dhaqaatiir bukaan qaba xanuun qun uga daaweeya

26. Qoraagii afkiyo suxufiyiin dhaqanka qiimeeya

27. Soo qabyaalad maahayn wixii loo qisaasahayay?

28. Soo qabyaalad maahayn middi iilka qabadsiisay?
29. Qoryihiyo hubkii maata badan lagu qaraacaayay

30. Jahli aan waxqorin oo xilraba waaguu nugu qooqay

31. Qab qabliyo afmiishaar markuu suudka wada qaatay

32. Soo qabyaalad maahayn middi qaaday magacooda?

33. Soo qabyaalad maahayn middi loo qabbaanahayay?
34. Qolo qolo markii laysu dilay laysna qalanaayay

35. Markii qosyba qoskii ku xigay maarta ku quraacshay

36. Kolkii lays qardoofoo xumaha layska qaban wayay

37. Soo qabyaalad maahayn wixii la isku qoolaayay?

38. Soo qabyaalad maahayn middi laysu qarin waayay?
39. Qaxootiga aduunyada ubadan waanaloo qiraye

40. Intay baduhu qaadeen tahriib maydka quban xeebta

41. Dad ka quustay nolol oo katagay qurux aduunyaadba

42. Soo qabyaalad maahayd wixii lala qammaadaayay?

43. Soo qabyaalad maahayn middi quursi noo lagaday?
44. Boqolkiiba boqol duul muslinoo diin qurana haysta

45. Qola kale dadaan guursanoo aan qaldamin muuqa

46. Hidde qaaliyoon lumin daduu qaadir ugu deeqay

47. Soo qabyaalad maahayn middi gaalnimo u qooshay?

48. Soo qabyaalad maahayn middi qaladay sowdkooda?
49. Qalbi jabay caqliga qawrariyo quus laduluglaynta

50. Qaxan ololay dhiigoo qul-quloo lagu qareexaysto

51. Qiiqa iyo uurada dhulkii qarisay nuurkiisa

52. Soo qabyaalad maahayn wixii qiil ubixi waayay?

53. Soo qabyaalad maahayn middi qoobka aan roganay?
54. Qaramada midoobiyo markaan yuu en qurux moodnay

55. Qaliif iyo wadaadaba markuu gaalku qaawinayay

56. Qabka iyo xishoodkii markuu naga qubtoon waynay

57. Soo qabyaalad maahayn wixii ii qalacay hooga?

58. Soo qabyaalad maahayn middi nala qaniimaystay?
59. Shanta qaaradood meelkastaba waanagaas qubane

60. Qaaruun dhanoo bara kacdaa qadan mayeeshaane

61. Waxaa qaamudkood galay markay qab isku jiireene

62. Soo qabyaalad maahayn wixii noo hogaan qabatay?

63. Soo qabyaalad maahayn middi aan qarfaha meernay?
64. Qayrkaa adoo ladan ku jecel goortay kaa qubato

65. Oo xaajo kaa qulubto baad qun u ogaataaye

66. Markii aan qaxootiga noqdoon waayay qarankayga

67. Qisa naga dahsoonayd muxuu sabanku noo qeexay

68. Qalax iyo maxaan omos marnoon waano lagu qaadan

69. Quduriyo intii murugo aan wada qamuunyoonay

70. Hadii aad indhaha ka qarsataan quusta iyo ciilka

71. Oydnaan kaqiiroon gunnimo waad qayiranteene

72. Oo qabyaalad aydnaan katagin idinku qaan gaartay

73. Qatar tii kadaran baa ka iman qaaradda an-naale

74. Qalad waa dhacaa aadanuhu waa is qardoofaaye

75. Ilaa tan iyo qaabiil intaa qoonsi baajiraye

76. Boogtaan qumaati ubogsoon waa qumbucataaye

77. Inta aad qiyaar leedihiin saxa qilaafkiina

78. Qol kuxira qabira oo iblays yuusan idin qoolin

79. Quful iyo silsilad aan go’ayn kuqodba oo tuura

80. Isnacaybka ka qubaysta oo wada jir qaabeeya

81. Is cafiya quluub saafiyaan eebe qadinayne

82. Iimaan qabyaaladi dagtaa wuu qalalayaaye

83. Aan ku qoyno quraankiyo sunadaa lagu qaboobaaye

84. Qaraabo iyo ehel wada dhashiyo reer quraa nahaye

85. Shaydaanka qulubkiisa badan yuusan na qiyaamin

86. Qabribaa na sugayiyo xisaab iil naloo qodiye

87. Dad qiyaame dhowraaaya oo qoolan baa nahaye

88. Qiima male aduunyee lahwigu yuusan idin qoolin

89. Rabi lagama quustee baryada uqalisoo tuuga

90. Tubta teeda qayrka leh rabina hayna qabadsiiyo

91. Dadka yagoon qabyaaladi kujirin oo isku quluuba

92. Qaadirow adaa heli karee uu is gacan qaado. Aamiin..