Curiye:-Maxamed Dhicisow

1. Halkay qaab ku leedahey murtidu, way ku quruxdaaye
2. Nin hadduu abwaan qaaliiyo, qaaddi gabay sheegto
3. Qowmkiisa waa inuu baraa, qaacidaan harine
4. Taariikhdu waa inay qortaa, sida quraankiiye
5. Qaamuusta iyo lagu dhigaa, buug qaraamiyahe
6. Haddii kale qof weeyaan lahayn, eray la qaataaye.
   
7. Soomaalaay oraah qodobalaan, idinku qiirayne
8. Qalqalkiyo dhibaatadu horey, noo qallaafteene
9. Qalbi saafi iyo wadajir baa, lagu qaboobaaye
10. Laba qoys haddii laysku daro, qarandhan weeyaane
11. Qarjaf waxa ka dhigey nabad dawaan, kala qaloonnaaye
12. Haddii aan mid qura noqon lahayn, amase duul qawl leh
13. Ciiddeenna baan qodan lahayn, mana qolfoofneene
14. Qurbahiyo ma aadneen dhulaan, laga qibloonayne
15. Asaaggeena nama quursadeen, sida quraafaade
16. Waxaad qooshataa laga helaa, qaradki aasnaane.
    
17. Qabya-joogga, dan-u-quusadkiyo, qaranka heehaawga
18. Qurbahiyo qaxoontiga sidii, qaatil ugu noolka
19. Is-qiiraynta, qarawaynidiyo, dibu qushuucaynta
20. Qaaddirow maxey badey dhibtiyo, qaana la humaagga
21. Qaynuunki abid lagu ogaa, oo qubxiya weeye
22. Kaharaay qabyaaladi wallee, qiima laga waaye.
    
23. Qiil-doonka, qurun-qaadashada, xuma u qaylaynta
24. Qayrka-ka-cararka, shar-la-qooqa iyo, kala qabboonaanta
25. Qaansa-leebka, is-qafiifintiyo, qoobabka itaalka
26. Qorraxaynta, qarxiyaayda iyo, qoorya-xero-beelka
27. Qaynuunki abid lagu ogaa, oo qubxiya weeye
28. Kaharaay qabyaaladi wallee, qiima laga waaye.
    
29. Qori-doonka, qambaruursigiyo, qolo ku faanfaanka
30. Qoor-goynta, qaan-gaar la dilo, qayrin-ku-xabaalka
31. Qoomamaynta, is qiyaalintiyo, sawdka koru qaadka
32. Qamuunyada xigtiyo, qaab-darrada, qoofal u ahaanta
33. Qaynuunki abid lagu ogaa, oo qubxiya weeye
34. Kaharaay qabyaaladi wallee, qiima laga waaye.
    
35. Qabqablaynta, quursiga socdiyo, qaadan kariwaaga
36. Qan-qaniinka, qorrataynta iyo, qodobka boodboodka
37. Qof la dirirka, qaacida roggiyo, hadal qabiilaynta
38. Galabtey qallibantana qaskiyo, kala qaraabaynta
39. Qaynuunki abid lagu ogaa, oo qubxiya weeye
40. Kaharaay qabyaaladi war-hoy, qiima laga waaye.
    
41. Bulsha-qoolka, ummad-qaawintiyo, sharafka qaadqaadka
42. Qaxootaynta, xera quudintiyo, qamaddi tuug-tuugga
43. Quwaddaad lahayd waaga’iyo , qayrka-wax i siida
44. Sinjigii qurxoonaa gab iyo, magac qasaalaynta
45. Qaynuunki abid lagu ogaa, oo qubxiya weeye
46. Kaharaay qabyaaladi waatii, qiima laga waaye.
    
47. Waxba gabaygu yuu ila qummine, waxan ku soo qooley
48. Qabyaaladi waxey daba-jartaa, qowm walaalaahe
49. Kaharaay qiyaastey waxaan, ugu qiraalooday
50. Qiima ma leh adduunyadu haddaad, qaran jab-joogtaaye
51. Qaxar bay niyaddu qaadataa, iyo qamuunshow’e
52. Wixii aad qorshaysana mar bay, Wada qadhaadhaane
53. Nin qaxootiyoobow ma jiro, qiima kuu haraye
54. Hayeeshee dad baa qaaddicoo, qaadan Karin saase.
    
55. Abwaannada qa’laydaan hor kacey, qayr Alle ha siiyo
56. Bulshadii qaddarisee qorteyna, qayr Alle ha siiyo
57. Qalinlayda Soomaaliyeed, qayr Alle ha siiyo
58. Inta neceb qabyaaladda dhammaan, qayrAlle ha siiyo.