___Saafi waxay tiri iyada oo wajigeeda farxadi ka muuqato, ma sidiibaad wali gabaygii u

waddaa…? Wakhti ma haysto, haddii la I arkana waad

garanaysaa in wardiye culus lagu saarayo ee, wixii aad sheegaysay hadday run kaa tahay inna

dhaqaji, waan kula baxayaaye. Waxa uu u sheegay geelashan reerkooda inuu maanta u

yimid meelna u dhaafi karin.

 

Saafi waxay tiri ” waa kuwan aqaladannadii ee, geedkaa madow ee dhirta ugu gaaban hadhow

igu imo marka saqda dhexe lagu jiro”. Haye iyo hawraarsan ayey ku kala tageen. Siciid oo aan

nimanka geela haya mooye cid kale ka aqoon qowlo, ayaa ku soo laabtay geelashii. Salaan

kadib, waa uu u warramay raggii ay wax isku ahaayeen. Waxa uu u sheegay inay caawa saqda

dhexe guurayaan. Waxa ay siiyeen caano uu ku casheeyo. Dabadeed, markii la gaadhay xiligii ay

ballantu ahayd, noola socdana uun jirin buu geedkii isugu yimaadeen. Waayo waayo iyo mid

walba wixii uu sii mutay intay kala maqnaayeen bay isooga sheekeeyeen. Siciid oo ku han wayn

in ay raacdo, iyadna yara cago jiidayso buu ku yidhi:

Sambabka iyo beerkiyo

Halkaa saabka iyo wadnaha

Saafiyey adigaa hurdoo

Sariirbaa kuu dhextaal,

 

Saaxiibaday ways nacnoo

Sanqadha ka ilaaliyaan

Dhamaan isku seegnayoo

Cidlaan kaligay socdaa

Sidii aan kuu bartana

Waxbaa ila sarakacoo

Anigu soortaba ma cuno

Jaceylka sabaaliyoo

Sagsaag ka ilaaliyoo

Saafiya iga daa sahwiga

Aniga, adigaa ileh Ilaahay ka sakow. Siciid wuxuu jaclaa inay sheekadu caawo dhamaato

balse, saafi uma diyaar ahayn. Markuu damco inuu soo gabagabeeyo bay u saartaa

laamo aan laga gayoonayn. Siciid oo is xanaajinayo ayaa kacay oo yiri:

 

Inanyahay siraad u eg hablaha wawgu sidataaye

Soomaali dumarkooda waad ugu saraysaaye

Sarajooga goortaad kacdaa samay la moodaye

Socodkaaga iyo laafyahaa lala sarkhaamaye

Inaad soo kacaysiyo wallaal samir inaan qaato

Si wanaagsan baa loo hadlaa waan ku sugayaa.

inta kacday bay tiri ” gabay lagaa karimaaye waxaad yeeshaa waa xili danbe, haddii aynu

baxno subaxba waa la ina tabi oo waa la inaga daba iman karaaye, haddaba, kayntaa madow

ee galoolka badan subax soo gal. Gudun baan soo qadanayaa anigoo ku marmarsiyoonaya

iyo maydhax baan soo diranayaa ee sidaa iga yeel, subuxaba waynu baxaynaaa si aan habeen

danbaba Ramaas ugu dhaadhacno e.” Siciid wuu ka yeelay isagoo ugu maahmaahaya waayahay

“kaadi badane waa loo gogal badayaye.” Si qurux badan ayaa la isku nabad galiyay.

Wuxuu soo baxa cadceeda tiigsada ba, waxaa u baryey waagii. Go’aanku siduu ahaa isaga oo

madaxa ku haya buu horay u toosay. Hal dhashay oo ay nirigteedu ag taagan tahay buu gaawaha la hoos galay. Degdeg intuu u maalay buu horay caanihii ka sii qaatay. Waxa uu soo

ambabaxay xidhkii ay ku tidhi igu sii sug. Waa uu yimid kayntii jiqda ahayd. Isaga oo kolba

qoor diinlaynaya ayuu reerka eeggaa. Xoolihii oo wada kala dareeray iyo dadkii oo wada kala

shaqa tagay buu arkay. Waa la gaadhay xili barqo kulul ah. Hase yeeshe, weli ishiisu ma

qaban Saafi Ciid, goor cadceedii sii kululaatay oo ay barqo dheertahay, wataas saafi oo bila

gudin ah socoto. Balse, wax bay xambarsantahay. kaynta meeshay kaga soo beegnayd buu u sii galay. la isu yimid. Indho jacayl la isku eeg. Salaam kaddib, waxay ila tahay inaan waxba kaa danbayn oo aad soo diyaar garoowday, ayuu ku yidhi. Maya, maya awrtaa xidhxidhan inaan anigu seeteyo oo, aan maqasha adhiga ee edagta ku jirtana inaan banaanka u sii daayo baa la iga rabaa, ee waxaan isi idhi u soo sheeg. Siciid wuu cadhooday isaga oo u arka inay

waxay sheegaysay oo dhan ay been yihiin, oo ay doonayso siday Cabdirashiid u gashay inay u

gasho buu ku yidhi: 

Guurtidaanu nahay golola dhool waadan garanayne

Waxaanu nahay raggaan guur u dayayn gaashka naagaha’e

Gola joogga laafyaha midii gacanta saydhaysa

Ee gaari loo hubo hablaha waanu gadanaaye

Geeli iyo waxaan siisanaa googo lacageede

Galabtaa dambeetaa aroos laga gigsiiyaaye

Gool baa halkaa lagu qalaa gananaanjiraye

Goonyaha waxaa laga ridaa gumuc rasaaseede

Gowdaa ciyaar lagu hayaa gaadh habeenimo’e

Gayaanku adiga amahoo gayiga gabadhi waa buuxe

Gow iga sii hadal cadbaa lala gedoomaaye.

Iyadoo leh gabay lagaa karimaayo mise waad xanaaqday, adigaan kugu eegayee. Waxaan

xambaarsanahay waa dharkaygiiye ina mari. Saciid oo neef wayni ka soo booday,

farxadna oogadiisa saaqday baa yiri “ina mari dhib miiran baad tahaye.”