Ma ogtahay hooyo:-

Murugada iyo kalinimada  ay inantaadu ka dareemayso dhankaaga markaad ku tuurto meel aadan u sahamin gabadhaada.

Hooyo ma la socotaa in ay tahay maalinta guurka inantaadu gaadho in ay kaaga baahan tahay garab iyo gacan waalidnimo.

Ogow iyadu may garan waayin in ay ku kacdo falkay doonto se waxay dhawraysaa sharafta iyo sumcadda reerkooda oo aad adi iyo aabbeheed ka kaw tihiin Allaha ku dhawree Hooyo dhawr xuquuqda iyo rabitaanka ubadkaada.

Maanso 

Gob-baadh 5/3/2008

Guuleed {Geesdiir}

Aadmiga goor iyo ayaanba

Gorgortan weyn baa dhexyaalla

Sheekada goofaadhigooda

Markay cidba goonideeda

Amaanta u goosanayso

Dooddiyo goosgoosyadeeda

Magaca loo wada gucleeyo

Markii lala tago garoonka

Anaa gob ah iyo anaa ah

Goor walba waa lagu murmaaye

Labada goolaaftamaysa

Markay tahay kala gurkooda

Dadnimo loo soo geyoodo

Qofkii dhaqankeeda goosta

Sifaha lagu garan karaayo

Haddaan galo oon tilmaamyo

Markuu gacal wada hadlaayo

Waatii gobi kala xidhoodka

Iyadoon ka tagayn gediisa

Haddana talo wada gorfaysa

Gabdhaha iyo wiilashooda

Waatii isku guurintooda

Khilaaf iyo gooh ka dhawrta

Doonista iyo gogoldhiggeeda

Iyadoo laba gees u taagan
Haddana guud ahaan midaysan

Waatii gacallow tidhaahda

Geesigii hebel baad wadnaaye

Gabadha ina hebel na siiya

Waatii guntin iyo gabbaati

Amaa guunyada dhextaalla

Isgaadhsiisee asluubta

Ilaalisa ee guddoonka

Farxadda gebi marag u yeesha

Dabeed gebobgebo dareenka

Waatii isku siisa goobta

Duciyo gacan qaad wanaagsan

Lammanaha guri dhiskooda

Xilliga socda iyo giraanta

Tirada gudubtiyo hadhaaga

Waxay soo raad guraanba

Wakhtiga inaa loo godeeyo

Amaa loo sacab garaaco

Goorteed iyo kheyr ahaaday

Waatii galbisee ku hoysa

Aroos loo wada golyaayo

Waatii gaafkiyo amaanta

Ciyaartiyo galinadeeda

Iyada oo aan ka gaabin

Waatii gef la’aan u heesta

Weliba waan gurguuranaaya

Sadqada gawraca tidhaahda

Markay golxadkii marshaana

Mashxarad googoysa fiican

…