Suugaanta jacaylka iyo maanta oo Arbaco ah, waxaad maalin kasta oo Arbaco ah nooga barateen murtida iyo maansooyinka hal-abuurka. Waa bahda Dhugasho oo idin leh Akhris wanaagsan. 

Waa maanso jacayl ah murtidii Axmed Xasan Xuseen (Axmed Shilke)

Boqol jeer ku maamuusay

Ku mintiday jacaylkaaga

Milgahaaga qiimeeyay

Ku matalay adduunkayga

Kor u qaaday magacaaga

Miisaamay sharaftaada

Marlay dumar intaa joogta

Kaligaa ku maan raacay

Milicsaday hannaankaaga

Ashqaraaray muuqaaga

Ku mashquulay quruxdaada

Muxibbooday araggaaga

Murug galay la’aantaada

Abaarsaday Maqnaantaada

Maarmi waayay kalidayda

Maalinteenna sugi waayay

Mahadhada dareenkaaga

Igu maran xasuustaadu

Milyam jeer anoo xiisay

Kugu sooray maankayga

Ma huraanka noloshayda

Ma dhaafaanka dookhayga

Miyirkood u tahay daawo

Ku midownay gacaltooyo

Macaansaday odhaahdaada

Kalmaddaada meeleeyay

Aawadaa u maansooday

Kugu sooray midhahaygan

Dhirta oo mankii fuulay

Geedohoo magool yeeshay

Hoobaanta midabkeeda

Ku mataalay jaahaaga

Ku maqsuuday kulankaaga

Muraaqooday garabkayga

Kolkaad joogto midigtayda

Innagoo is maanweelin

Muftaaxii kalgacalkeenna

Iyo ubaxa muuqiisu

Yahay midabka dhiiggayga

Mulki weeye kuu gaara

Ka masaxay quluubtayda

Midh kastoo namiimkeenu

Igu dhaho maqnaantaada

Marka aadan ila joogin

Adiguna marwooy heedhe

Kalsoonida ha maandhaafin

Inta aad masayr qaaddo

Maandheey ha fududaanin

Marinnada darbigan teedsan

Muska yaal dhex dhabeheenna

Waayahan is daba meeri

Yaanay maydhin samirkaaga

Farxad muuji noloshaada

Maanka ooy ku taal boogi

Dhoollaha caddee muuqa

Hana jabinin mooraalka

Haddii aan midkeen duunka

Laga waayin muuqiisa

Ama calaf na kala moosin

Barri weeye meherkeenu.