Mar kale doob iyo gashaanti

Dunida guudkeeda jooga

Waa tii is gayaansi gooda

Markay tahay aqal galkooda

Si ay u gutaan xilkooda

Tilmaan iyo garab ku siiya

Guhaad iyo ceeb ka dhawra

Nolasha adag iyo gasaangas

Si ay ugu diido gaajo

Waa tii goor iyo ayaanba

Gadhoodh iyo caano dhay ah

Murmure subag lagu ganaanay

Intoo loo sudho gadaanka

Waatii gobi siiso maalmo

…

Gorfaynta hoggaaminteeda

Markay tahay garashadeeda

Waatii god dalooladeeda

Ogaatee wada gufaysa

Meelaha laga soo galaayo

Dadkoo wada cuna gasiinka

Col iyo godobina dhex oollin

Safarka iska ganacsanaaya

Guuraha iyo socotadiisa

Jidgooyiyo gaadmadeeda

Midnaba ma kala gayaane

Hadday dhacdana gefkeeda

Waatii qiratee garaadka

Gardaadisa ee caddaysa

Inay gardarrada dawayso

Duqay gadh wadiyo wadaaddo

Aqoon ku gadaaman haysa

Ayaa gudbin kara wanaage

Gar iyo is hor fadhiisigeedu

Markay guddi xulasho joogto

Waatii runta gobi ka sheegto

Abaal loo galay taqaano

Waatii gu’dis iyo ogaale

…

Geyiga oo wada abaar ah

Daruur biyo galisay ciidda

Geesteeda hadday ka hoorto

Waatii gobi lala wadaago

Gadood iyo aanadiisa

Intayn kala gurasho gaadhin

Guuxguuxiyo bala alooska

Waatii gobi wada bakhtiisa

…

Intayn guunyadu aroorin

Guduudkiyo waa dhawaadka

Gorofka ceelalyada la roortay

Waatii dixda goof ku yaalla

Salaadda ilaa gadiidka

Dhexdooda ku gabagabaysa

Gacanka madaxana wadaagta

Dantiyo guurguuristeeda

Markay tahay goobisteeda

Gaadiid waa lama huraane

Talada gurgurshaaga joogta

Waxaa gobta caadadeeda

Inay isku wada gargaarto

Geeddiga isasiiso awrka

Martida goleheeda joogta

Waataan gabinee bartiisa

Mar walba gaawaha hogaysa

Xoolaha godladay ku maasha

Waatii gudhan iyo irmaanka

Meel baad iyo biyaleh gaysa

Habeen gudcuriyo dharaarba

Waatii gobi feejignaata

Waatii guud ahaan xaqeeda

Gaashaan iyo waran ku eegta

Xaaraanna ka gaws xidhnaata

Xilliga ay gallad haleesho

Nimcaday ku gaalaa baxayso

Inuu u gadhoodhshay Eebbe

Waatii iyadoo garawsan

Guullaw mahaddaa tidhaahda

Geerida wakhtigeed aqoonsan

Cudur gabaw iyo dhibaato

Midnaba iyadoon ka guuxin

Waatii gobi amarka Eebbe

Guddoonsata een ka roorin

Hadhaw samir gaax ka maasha…