Wax la yidhi, Allaha u raxmee, Shariif Mahdi Shariif Maxamed oo ku magac dheeraa (Shariif Laate) iyo Sheekh Bashiir sheekh Axmed Nuuradiin, waxay ahaayeen laba nin oo ilma abti ah, laba nin oo caaqiliin ah, laba nin oo abwaaniin ah, laba nin oo cilmi diineed leh, maaddaama ay ka soo jeedeen qoy xer diineed ah, oo diinta dariiqo u ah. SHeekh Bashiir iyo Shariif Mahdi, waxay ahaayeen laba nin oo aad isku jecel aadna isku xifaaleeya. Waxaa la yidhi, waxay isku bixiyeen laba naanaysood oo qosol ah, (Laate iyo Cusa) waa labadii sanam ee qureesh caabudi jirtay intaan Nabi Muxamed (scw) loo soo dirin. Sheekh Bashiir wuxuu Laate u bixiyay shariif mahdi, sidoo kale Shariif mahdi wuxuu Cuse ku dhihi jiray Sheekh Bashiir. Labadoodaba Allaha u raxmee, magacyadii naanaysta, waxaa taariikhda u galay midkii shariifka, oo Ilaa maanta waxaa loo yaqaanaa (Shariif Laate). Taariikhdaa hor dhaca ah, ka sokow maanta waxaan soo qaadanaynaa gabay xikmad badan oo kooban, oo uu shariikh Mahdi shariif maxamed (Shariif Laate) ka tiriyay, arrin isaga qabsatay intii uu Joogay dunida. Gabayga wuxuu ku xusayaa Sheekh Bashiir, sida aad ka dareemi kartana, wuxuu ugu xusay in ay qummanaan lahayd in ay is garabsadaan, wuxuu yidhi:-

Abtirsiinyadaa riixan baa lay rikaabsadaye

Waxa aniga lay reebayaa reer kalaa tahaye

Runse hadii aan doonayno oon la is ramiimaynin

Rayax haduusan jirin waanigii ruumadkii galaye

Iyagoo rakaalkii sitiyo Ruushka qalabkiisi

Ragaad iyo Jabhadihii ninkii soo raraan ahaye

Birmadkaan ku ruux go’ay markaan raacdadii dhaliyay

Rajo halkaan ka dhawraayay baa hoos la ii ridaye

Geelaan riddada loogu jirin een rag lihi haysan

Hadba dararka sida looga rogi uunka kala raacye

Ritiga baadida ah geeljiruru ruugga ka uleeye

Nin shisheeye raacoo dhan baa qaba rafaadkaase

Ogaadeen in uu raasgas helay raadiyuhu sheegye

Reeraha nin baan tuhunsanaa raasna ii xigaye

Ra’yi ba’e Bashiir baan lahaa waa rafiiq adage

Isaguna raqdaydii ma odhan ruuxan yaa dilaye

Rabbi hiilki mooyeen ma jiro cid aan u rooraaye.