Ganku raallimaahiyo markaad gawska qabataaye

Galgalmaysigii baa hurdada gama’ la diidaaye

Adigoo galgalanaaya baad gaydh ku baridyaaye

Goobey madaw iyo jidhkaa gamas la saaraaye

Galgalluubna waa loo baxaa gooni kaligaaye

Ninki kuu garaabiyo ninkii kugu guhaadaaba

Inaad goradda laalaadsatiyo gocosha ciil baa leh

Hadi xaaja geed loo hadhsado garasho weeyaane

Guubaabo iyo waa inay garab mudnaataaye

Waa gacal la’aan maalintay gabi dhaclaysaaye,

Hadi gabadh la maamuuso oy guur u hanaqaado

Guubaabo iyo waa inay garab mudnaataaye

Waa gacal la’aan maalintay go’ay tiraahdaaye

Geesigu ma daalee hadi ganafka loo dhiibo

Guubaabo iyo waa inuu garab lahaadaye

Waa gacal la’aan maalintuu gabax yidhaahdaaye

Gobanimada waartiyo ninkii guul la kulansiiyo

Guubaabo iyo waa inay garab lahaataaye

Waa gacal la’aan maalintay gaasir noqotaaye

Gaajada inaad kaga baxdaa geela la arkaaye

Hayeeshee gun iyo waa iney garab lahaataaye

Waa gacal la’aan maalintay gabagabeeyaane