MAANSO

Jacaylkeennii anbaday

Barnaamijka Suugaanta ee bogga Dhugasho Arbaca kastaa.

Shalay ubax baad ahayd
Ishaydu ku doogsatee
Maxaa eegmada ku dhacay
Ayaamahan kuma arkee…
Itaalkaygii ma gabin
Asaaggaa kaa calmaday
Awood kaamaan xasayn
Waxay ula jeeddo tahay
Anigu ubax baan sidee
Si aan aayuhu u dhadhin
U hoor erayada cishgiga
Haddaan inanyahay ku idhi
Ushiisii maad biyayn…
Jacaylkeenii anbaday
Ishaaro inaan ka helo
Anoon raadkaba arkayn
Waxaan ordayaa habeen
Cidlaan ku ag meerayaa
Or baan maqlayaa i tidhi:
“Jacaylkii aamusaa
Abaar buu daaqayaa.”
Hillaacyahaw ii iftiin
Haraadyahaw oonka bii
Habaasyahaw ii arrimi
illoow jiifkaba hurdooy
Arooryahay kaaha dami
Riyooy istareex i sii.

Cali Ileeye.