CURIYE:- Aadam Asad Ibraahim

1. Danbi maleh Qabyaaladi, Ninkii diido idilkeede
2. Hayeeshee ninkii doojistaa,  duuda loo suriye
3. Daacadiyo cadliga duul ka duday, duhur ma joogaane
4. Danahooda way daba maraan, laga daboolaaye
5. Dowladaha ma gaaraan dayaxa, duulimaad tagaye
6. Waxashkiyo midkii dubi jiraa, dabro dabadeede
7. Waxaan oga danleeyahay ayaan, idin dareensiine
8. Iminkaba dadkeennaa qabiil, loogu dow galaye
9. Saqiir iyo duqoow iyo dhamaan, da’yartiyo shaabka
10. Gidigood wixii daashaday, sii dugsanayaane
11. Kuwii hore dabkii ay shideen,  naarti lagu daatay
12. Oo aan La damin bay markale,  dogobyo saareene
13. Dooyiyo colbay dumahayaan,  daa’in abidkooode
14. Xasiloooni lagu diirsadiyo,  diide nabadiiye
15. Ubadkoodi way daayaceen,  mana daryeelaane
16. Dariiqaad maraysaba wakaa,  tuban dadkeeniiye
17. Dureemada kabadan maydka iyo,  dhaawac daadsaniye
18. Dumarkeeni waataa saxraha, oon ku daashadaye
19. Dibjirkiyo dadkii darafta yaal,  daalinbaa galaye
20. Gaajadu kuway dubataybaa, docodocaystaaye
21. Keenyan dalkii kaa diraa, kuugu sii darane
22. Ragbaan jirin u diirnaxahayoo, galin daneeyaaye
23. Nin damqada la waayoo dalkiyo,  eego danahiiye
24. Qabiilbay la dananaan dhamaan,  duulku waa ebere
25. Cadowgeeni kii ugu darnaa,  waakan soo dagaye
26. Dabaabaadka baa lagu dunshaa,  daar wixi haraye
27. Dheemenkaa la dalandalanayaa, dowrka maantada e
28. Kaluun dabasho waa waxay,  badaha uga dinnaahayne
29. Xoolaha dagaalbaa ku socon,  mana dareentaane
30. Daawaday ku durayaan wallee,  waa sun tii darane
31. Waa cadow dahsoonoo runtii,  way dagaalamiye
32. Dadaal iyo juhday galinayaan,  dabarjarkeenaaye
33. Daaqina ragbaa gubahayoo,  diiray idilkiiye
34. Caqli durugsanbaynaan lahayn, lagu difaacaaye
35. Qabyaaladi darteedbay indhihi,  damag yidhaaheene
36. Anaa daran dantay ma aha iyo,  diidey taladiine
37. Intii aynu doodaas wadney,  guurtay dunidiiye
38. Rakaabaynu nahay doon sugiyo,  daaladii rariye
39. Iga dadan waxaan doonayniyo goob la dagayaaye
40. 39:Dakanada kuwii naga hayeen waaya badan daynay
41. Damacbaa markale soogaloo way durbaan tumiye
42. Daandaansibay muujiyeen wayna dagayaane
43. Dal lahely sidiisii xadkay soo durjinayaane
44. Waataa dafooftii (xabashi) xumayd doonyo keensadaye
45. Safiiray u soo diranayaan daginka qaarkiiye
46. Nin seexdaa sicii dibi dhalaa da in abidkiiye
47. Inagaa duliga hoorsanoo duud naloo suriye
48. Dubaabkaan ismaqal oon lahayn duub hagaajiyo e
49. Dabcigiisabaan leenahoo daa in waa marage
50. Dhex dabaasha goobtaad rabtaan dawarsadoo jooga
51. Dunidana gunbaan noqonaynaa ciida lagu daadsho
52. Dir dir loo dagaaliyo col iyo Guuto daba joogto
53. Degin la isu diidiyo dhul iyo daaqa iyo baadka
54. Hadaynaan xumaha daynin iyo dirirtan aafaysan
55. Danteeniyo hadaynaanan garan diinta waxay reebtay
56. isku dire hadaynaanan qaban daalin iyo tuuga
57. Dalka waa la dhacayaa ragow goortan dabadeede
58. Dunidana gunbaan noqnaynaa ciida lagu daadsho
59. Waxbo yaanan maansada durjine waan dabrahayaaye
60. Isku duubnibaa lagu helaa dowlad xoog badane
61. Duul wada jir qaataan wallee cidi ku duulayne
62. Danaheena eegaay ehlooy oo dadnimo raadsha
63. Kala didid danaaniyo ka taga ehel dagaalkiisa
64. Daalimkii wax dulmana qabtaay doogsi wuu imane