Ka Bogasho Wacan:-
Gabayga:- “BIR-MA-GAYDO” :-
CURIYE:- Sahal Cabdullahi Buule
Amminta:- 19/06/2014
Dalka :- CANADA

1. Ma’da gabayga suugaan milgale, masafo googoosa

2. Geeraar murtile heellada macaan, mihindiskii saarka

3. Meelbaan ku tiirshaye ma curin, maalmihii tagaye

4. Eegaanse maraqii ka furi, midig ka haaneedi.
5. Runtii maganta beentaw ahayd, murugtay xaalkeede

6. Cadligoo xaqdarro sii martiya, muuno beel noqoye

7. Mucna erayga miisaaman bay, dhago majeertaane

8. Mabda’ xumida magaceed ba’daa, mur iyo deebaaqda

9. Qabyaalada maroortiyo ciqdiga, maanka lagu haysto

10. Masiibooyinkay dhalisay baan, midhadh ka faalayne

11. Bir magaydadaa aan labixin, maxasta bayhooftay

12. Mahurtada is dooxaysa iyo, maati le’anaysa

13. Madiga hooyadii kali lahayd, aragto maydkiisa

14. Mashaqada qabyaaladu dhashiyo, murugo sow maaha?!
15. Reeraha la maydhaamayee, xumaha loo miisay

16. Ee Mooska lagu teediyee, dayrka lagu meershay

17. Muuq iyo AF iyo Diin ileen, mala mid weeyaane

18. Magacyada silooniyo ragoow, midab-takoorkaasna

19. Mashaqada qabyaaladu dhashiyo, murugo sow maaha?!
20. Maneenada siyaasigu watee, ku marmar soonaayo

21. Muusanowga beenta ah hadduu, toos umaqashiiyo

22. Muraadkiisa gaarka ah dhakhsaa, loogu meel marine

23. Mihnadiisu Waa tiisa qudha, waana loo marage

24. Waxa madaxa looguba lulaa, magac qabiileeda

25. Waxa mool Wadaantii kuriday, baadilkana muujay

26. Mashaqada qabyaaladu dhashiyo, murugo sow maaha?!
27. Caqligiisa ruux maalayaa, maba daneeyeene

28. Majaraha caqiidada saxda ah, mooge laga daahay

29. Macaan bay qabyaaladi u tahay, malabsidiisiiye

30. “Cimraankii” makiidada u dhigay, maahirkana sheegtay

31. “Umawiguu” minjaha xaabiyee, meesha kana qadaayay

32. Sawkama macaasheen haday, haybi tahay maangal.
33. Qarankii milgaha wayn lahaa, magaca soomaali

34. Waxa dumiyay saw miidhistiyo, maaha magac-sooca?!
35. Marxaladaha aduunkana kajira, milaygan aan joogno

36. Muruq iyo naf iyo maal ba yurub, waa mid gabigoode

37. Mafogayna goortuu “Jarmani”, mirayay “Baarise”

38. “Faransiis” mataanay noqdeen, maanta “Ingiriise”

39. Maskax talisay baa aayar uun, maydhay xumihiiye

40. Ka masaxa quluubtoo naxliga, gees isaga meersha