Gabayga dhunkaal

Dhimasho iyo nolashu waxay isku jirtaa labada dholloode

Dhako meyd markay yeelatay baa geyshu dhiidhiyaye

Dhurwaayada kuwii naga xidhxidhay way na dhiciyeene

Damaantoodba waw mahad naqnaa kuna dhawaaqnaaye

Dhanbaalada is daba yaacayiyo dhabaq la’aanteede

Dhaantada shacbigu qaadayaa waa dhibtii hore’e

In kastoo wisiir dhibi lahaa, jeelka lagu dheelmay

Oo dhoorrayaashii sarsare dhababka loo jiiday

Dadku tawradduu dhawrayaa waa dhursugayaaye

Dhoobadu halkii ay fadhiday looma dhaadhicine

Dhexda nimanka noo joogsaday ee dhaxanta noo saaray

Dhiigyacabyadii lama qaqaban dhiirranaan jiraye

Jeeroo maxamed loo dhisoo dhididku hoobaano

Nin waliba wuxuu dhimay illaa dhabarka loo saaro

Jeeroo waxay naga dheceen lagaga dheemaasho

Daarahan la dhiibsaday illaa laga dhawaateeyo

Dhacadiidki jeeroo rag badan dhawda laga saaro

Jeeroo rag lagu dhugtamayoo dhaaftay la arkaayo

Dhunkaal shilinku jeeruu noqdoo dhuunta mari waayo

Dhabaqsiga la dayn maayo iyo dhiilki lays baraye

Dhabbahaa aan soo jilay haddii laga dhabayn waayo

Dhutis xaalku kama baaqsadee dhuuxa hadalkayga