Geeraarka dhulkiisa qawade

Xasan geeraarkan wuxuu curiyay markii uu arkay dad badan oo soomaaliyeed oo tacliin leh iyo kuwo kale oo aan lahaynba oo u xoogsi tagaya una dhoofaya  dalal qalaad iyaga oo dhulkooda saluuggan. Isaga oo markaas garanaya dhibaatada ay taasi u leedahay hormarka dalka, ayuu geeraarkan dadka jaadkaas ah ku guubaabinayaa inay dalkooda aaminaan khayraadka korkiisa iyo ubucdiisa buuxana iimaansadaan kalana soo baxaan. 

Wuxuu jidhi:-

Dheg bay doqoni leedahay

Dhabta aan u sheegine

Dhoylaawe waa kii

Dhabaabaco is qaadee

Dhulkiisoo xoroobiyo

Dhaqankiisa diidee

Dhabta maanta joogtiyo

Dhaayaha arkaynine

Dhaqashiyo dadkeenii

Dhimashaba wadaagyoo

Dhagax aanu jabiniyo

Dhoobada qodaalkiyo

Dhakal geela haystaa

Dhafaruur koley tahay

Dhuuniga uu quutaa

Dhididkiisa weeyoo

Dhalashaanu gaadhnee

Ninkii dhoofa maantee

Dhul shisheeye dagayow

Dhalliil baa ku raacdayoo

Dhunkaal baad qaniintee

Dhurwaaguba laf meel taal

Dhaaxuu calaashoo

Dhuuntiisa xagatoo

Dhiig kaga tifleeyee

Ha u dhuran walaalow

Dhidarkii cadhoodee

Dhogortiisa iibsaday