Cumar wuxuu ku noqday Hibo isaga oo u sheegaya waxa na dhaxmaray iyo jawaabta aan siiyay, wuxuuna tusaale u soo qaatay isla ruwaayaddii, da’da maanta iyo duruufta jirta ee uu lahaa Abwaan Geesdiir waxayna ahayd sidan: 

Hibo

-Cumarow sida aan u arkaayo

-Aabbahay u tagtee

-Aakhir tii uu ku siiyay

-Ii sheeg bal xabiibi

Cumar

-Hiboy aduun baan islahaa

-Intii ay odhan layd

-Wuu ku diiday Cumar

-Codsigeeda u oofiyee

-Arrinkaasi in uun 

-Marna aaya lahayn

-Horaba waan u arkaayee

-U jeedadaase ahayde

-Intuu uurku buki laa

-Addinkaa la dhibaaye

-Mar haddaan odaygii

-Inta aan is hortaagay

-Inantaada i siiyoo

-Adeer iigu ducee idhi

-Eedi way iga baydhaye

-Isaguna sidaan filaayay

-Mayuu iigu jawaabay

-Taa sidaa ku ogow

-Midna waa iga dardaaran

-Adiga aan ku faraayo

-Aqbaley labadeenu

-Axdigii aynu lahayn

-Inkastoon kala raagnay

-Waan adkayn dhinacaygee

-Adiguna sidoo kale

-Hablihii Afrikaankee

-Arligii ay ku dhasheen

-Marka ay ka tagaan

-Dhawr ayaamood dabadood

-Inkiraayay qofkey

-Balan ay ka dhaxaysay

-Aqbaley tagidaadu

-Yaanay kaaga ekaane

-Jacaylkii aynu abuurnay

-Ka ilaali ilawsho

Arrintu markay isku shareertay Hibo way rajo dhigtay maadaama aan siiyay mid iyadu aanay nolasha u dooran inuu la qaybsado. Waxaan cadaadis xoog ah saaray, Hibo hadday tahay dhanka nolasha iyo dhanka qoyskaba, waxaan ku qasbay in ay guursato Daahir, oo ah aniga saaxiibkey. Hibo iyada oo dhibsanaysa uurkana ka diidan bay yeeshay Daahir arooskiisa. Waxay ku soo hal qabsatay, mid ka mid ah geeraarradii riwaayaddii Da’da maanat iyo duruufta jirta,, waxayna ahayd sidan:-

GEERAAR

Rixinadii i dhalayow

Maahmaah raagtay baa tiri

Taladaan la ruugayn

La rogrogin rag kama talin

Raadkeedu waa hawl

Rabashiyo dhibaata leh

Aabbe hay ribaynina

Hooyo haygu riixina

Reer aanan doonayn

Rasmi uma dhaqaayoo

Raarta umam galaayoo

Isnan iguma reeyee

Raran haygu tuurina

Ra’yigayga sidaan qabo

Raaxada aduunyada

Rukunkeeda koobaad

Ruuxba ruuxa uu rabo

Raalligaliya aragtida

Inuu helo ku roonaa

Haddaan roori lahaayoon

Raadco doonka jacaylka

Rugtii aan ku ogaa iyo

Raaski aan tagi laa

Rafaadkaa iyo hawsha

Waan ka raysan lahaaye

Baddan yaa iga riixa

Run haddaadan u duulayn

Ama raacin diyaarad

Rooxaan sideedana

Riyo aanan ku tagi karin

Rafiiqey halkuu jiro

Sida roon rabbaa oge

Rajo Eebbe aan sugo

Markaan maqlay aqbalaadda Hibo ayaan waxaan u farxay si niyad ah anigoo niyaystay sawir tayna in hadda uun aan u dhacay lacagtii adduunka maadaama aan inantayda u dhisay nin qurba joog ah oo aan anu weliba ku qasbay.