Barnaamijka haybadda iyo hibada nool, waa barnaamij suugaaneed aan taxane ka dhigi doonno oo aad kala socon kartaan boggan Dhugasho maalin kasta oo Arbaco ah Idam Alle. Gabayga ugu horreeya waxaa curiyay Abwaan Axmed Shilke, waana gabay uu ku cabbirayo xulashada gabadha wanaagsan.

Adduunyadan macaan iyo qadhaadh la isku qoofaalay

Boqollaal qorshoo qaybsan iyo waayo kala qaada

Nin walbaba wuxuu qabanayiyo wixi qusayn doona

Halkuu qoobka dhigi iyo intuu quud anfacan doono

Intuu malab qudhqudhin doono iyo dacar intuu qooshan

Wax qatali naftiisiyo wakhtiga uu qudh bixi doono

Jannadii qaboobayd inuu qolal ka siin doono

Iyo naarta qiiqa leh mid uu qayb u heli doono

Ilaahii qorsheeyaa tihiyo qaaddirkii jara’e

Codsigaygan ii qabo adaan kugu qancaayaaye

…

Kala mudan qalbiga xaadhan iyo oogo quruxdeede

Qur’aankiyo mid aan baran watiin qaafir iyo tawba

Loox iyo khad taan qaadan een qalin ku feegaarin

Ama qaayo waynow kitaab galinin qoorteeda

Qormadii Rasuulkiyo (scw) axdiis midaan ku qawlaynin

Weysada mid aan qaadan iyo qalab salaadeedka

Oo aan qibla u jeedsanayn ama qushuucaynin

Sharaf way ka wada qaawan tahay qurux dhammaanteede

Qiyaas ma laha ooridu haddaan diini qabanayne

Xaaraan la qooshiyo sun bay qoorta kuu galine

Allahayow adaa qaadiree qayb ha igu raacin

…

Waxaad hawlo soo qabato eed qarashka raacdayso

Adoo qiiqayoo daallan oo qaba harraad xoogan

Markaad guriga qoob soo dhigtee qolalka soo gaadho

Mid aan biyo qabaw kula ogayn ama qobayskaada

Weligeed qufulan aan qoslayn qaayo iyo daa’im

Marna qaylo iyo buuq wadoon qaxar ka waantoobin

Qasaariyo dhib baa laga dhaxlaa qoomamiyo ciile

Allahayow adaa qaaddiree qayb ha igu raacin

…

Qaraabada mid aan soo dhawayn ehelna qiimaynin

Oo xishoodka laga qaaday oon abid qashaafaynin

Waa qaali sharaftuye mid aan xumo ka qiiroonin

Oo aan saxdiyo qaladka iyo garanin qaynuunka

Aadmiga midii aan qadarin ee qabku halleeayay

Ee aan qaddiifado u dhigan gogol la qaabeeyay

Ma qajila martida qadisa oon qado u meelaynin

Oo quud la calashoo yar iyo aan kabbada quudhin

Qiimahaada nolashoo dhan bay qalaw ka tuurtaaye

Allahayow adaa qaaddiree qayb ha igu raacin

…

Qashin jiifa eel laga qaxiyo qudhun dhex jiifaysa

Qayrkeed ma raacay filkeed hawsha lama qaybsha

Mar walbaba qandooday hurdada qulul u sii jiifa

Sidi ruux qudh baxay caynadii qayd iskama laaba

Magallooti qaabkiisa ley qoys ma tabantaaba

Ma qiyaasa qiillaay marnaba hawl ma qabanqaabsha

Qiimahaada nolashoo dhan bay kala qabyaysaaye

Allahayow adaa qaaddiree qayb ha igu raacin…

Gabaygan wuu socdaa…