Abwaan Hadraawi

Ergaduu farriintiyo

Ku adkeeyay heestoo

Igmadaannu kulanoo

Looxii ilhaankaan

Sida uur-ku-baallaha

Indhahayga saaroo

Warku waa ammaanee

Adna maxamed moogow

Aakhiro halkay tahay?

…

Aayadaha qur’aankiyo

Arraxmaan siday tiri

Hadalkii Ilaahay

Ruuxii islaam ihi

Sida uu aqoonsaday

Waa oomman hawdoo

Waa guri abeesoo

Edeg weeye hoosoo

Abataqan ku yaalloo

Waa iil madaw oo

Rabbigay addoomaha

Kaga aargutaayoo

Waxa laga arooraa

Irdahaa xabaashoo

Amban maayo ruuxii

Qabri lagu adkeeyee

…

Marna oosha guudkiyo

Waa oogadeennoo

Waa beer udgooniyo

Duni wada ilaysoo

Waa ceel irmaan iyo

Togag wada ordaayiyo

Ilo wada xareedoo

Lagu oon baxaayoo

Naftu eegma sugashada

Ashqaraar ka qaaddoo

Toddobaatan ooryood

Lala aqal galaayoo

Rabbigay addoomaha

Ku abaal marshaayoo

Dhibta lagu illaabee…